今日收到一個香港客專登打英文hotline嚟要求用英文通話，
好不幸地，呢個電話俾我呢件沙田大嘅香港蛋散接到，
好，既然個客要求到，我唯有硬住頭皮起住雞皮咁同佢用英文傾。
我唔知佢有語癌定純粹英文有問題，
佢一開口啲英文已經拋窒咗我。
我嘅開場白：「Hi, how can I help you?」
佢好大聲叫咁用港式口音逐個字跌出嚟兇我：「OH...YOU! CAN YOU TRANSFORM ME TO NATIVE ENG-GU-LISH SPEAKAAA..A? UK OR AMERICA!」
我心諗：「No lor！我點tranform你做native English speaker呀大佬，係都tranform我自己先啦。」
但我都嘗試transfer佢個電話俾一個美國同事，
但美國個同事一聽到係呢個客，
即耍手擰頭咁話佢一定handle唔嚟，
因為佢之前「有幸」接過呢個客嘅電話，
但最後都因為完全無辦法溝通而「不歡而散」。
我問西班牙同事，
原來佢之前都「中過招」，
佢叫我千祈唔好transfer個客俾佢。
咁我唯有用英文覆返個客其他同事都「忙緊」再問佢究竟有咩可以幫手，
佢有口難言咁嘗試用英文講出佢嘅問題，
可惜以我廿幾年嚟深厚嘅港式(沙田口音)英語根基都聽唔明佢究竟講咩，
難怪啲外國同事咁大反應。
我最後忍唔住問佢可唔可以講廣東話，
佢就一輪嘴好不滿咁話佢想同「英文同事」傾，
又投訴之前接佢電話嘅「印度人」好冇禮貌又唔明佢講咩。
我忍唔住一邊安撫佢一邊靜靜雞check吓個客嘅記錄，
發現佢所講嘅「印度人」其實係指一個英國同事，
仲要係「港女一聽就即冧」嘅英國仔口音嗰種，
（我唔識分英國邊忽口音，但應該係比較南面啲呱...）
講咗一大輪終於準備收線時，
個客問：「你係香港人嚟㗎？」
我答：「係。」
佢竟然話：「聽你講英文以為你係印度人或者大陸人囉！」
（我心諗：印度口音同大陸口音差好遠吓喎！）
佢再問：「你住邊㗎？」
我答：「我住沙田㗎。」
佢竟然話：「唔怪得我聽得出你有啲口音啦！」
我徹底崩潰。
